Prof. Cabdi Ismaaciil Samatar: Digniin Siyaasadeed oo Ka Dhan ah Jidka Villa Somalia

Hassan Gallaydh
Feb 7
2 min read

Xildhibaan Prof. Cabdi Ismaaciil Samatar ayaa si adag uga hor yimid qorshaha wax-ka-beddelka Dastuurka ee ay waddo Villa Somalia, isaga oo ku tilmaamay mid halis ku ah sharciyadda, nidaamka dawladnimo, iyo mustaqbalka midnimada Soomaaliya.

Prof. Cabdi Ismaaciil Samatar, oo ka mid ah mudaneyaasha Golaha Aqalka Sare ee Soomaaliya isla markaana ah aqoonyahan si weyn looga yaqaan gudaha iyo dibaddaba, ayaa maanta hadallo kulul ka jeediyey Baarlamaanka Federaalka Soomaaliya, kuwaas oo si toos ah u beegsanayey hannaanka hoggaamineed ee Madaxweyne Xasan Sheekh Maxamuud.

Samatar ayaa sheegay in Madaxweynaha uu ku socdo waddo khatar ah oo dhaawacaysa sharcigii uu ku yimid, isaga oo yiri:

“Xasan nasiibdaradiisu waa sharcigii uu ku yimid ayuu burburinayaa oo ku tarifalayaa.”

Hadalkan ayaa muujinaya aragti ah in Madaxweynaha uu ka leexday xeerarkii dastuuriga ahaa ee lagu doortay, isla markaana uu isku dayayo in awoodda lagu ururiyo hal xarun oo keliya.

Isagoo si cad u muujinaya walaac qaran, Prof. Samatar ayaa ugu baaqay shacabka Soomaaliyeed iyo hay’adaha siyaasadda in ay si masuuliyad leh u wajahaan xaaladda taagan, isaga oo ku dhawaaqay:

“Soomaaliyeey Xasan Sheekh aan iska qabanno, waddada Siyaad Barre ayuu ku socdaa.”

Isbarbardhiggan taariikhiga ah ayaa si qoto dheer u muujinaya cabsi laga qabo ku-noqoshada nidaam kali-talis ah.

Hadalladiisa ayaa sii xoogeystay markii uu yiri:

“Haddii la lahaa Siyaad Barre ayaa qaran dumiyey, waxa Baarlamaanka maanta ka socda waa ka daroo dibi dhal.”

Erayadan ayaa sawir ka bixinaya heerka uu Samatar u arko in xaaladdu ka sii liidato wixii hore loo soo arkay.

Muuqaallo ay qabteen kaamirooyinka Baarlamaanka ayaa muujiyey Prof. Samatar oo codkiisa kor u qaadaya, si cadna uga hor imanaya qorshaha wax-ka-beddelka Dastuurka ee Villa Somalia dabada ka riixayso. Falcelintiisu waxay astaan u noqotay kala-qaybsanaanta siyaasadeed ee sii xoogaysanaysa, iyo doodda qaran ee ku saabsan jihada ay Soomaaliya u socoto.

Su'aal Codbixin ah:

Ma ku raacsan tahay sheegashada Prof. Cabdi Ismaaciil Samatar ee ah in Madaxweyne Xasan Sheekh Maxamuud uu ku socdo waddadii Siyaad Barre?

Haa, waan ku raacsanahay isbarbardhiggaas.
Maya, isbarbardhiggaasi waa buunbuunin/xad-gudub.
Weli lama go’aamin karo.