Kiiskii Musuqmaasuqa Burco oo Galay Marxalad Cusub Kadib Sii-Daynta Eedeysanayaasha

Kadib xadhiggii mas’uuliyiin ka tirsan Dawladda Hoose ee Burco oo lagu eedeeyay lunsiga dhul danta guud ah, Maxkamadda Gobolka Togdheer ayaa u jartay 14 maalmood oo rummaan ah si baadhitaan rasmi ah loo sameeyo. Eedeysanayaasha ayaa markii dambe laga sii daayay xabsiga iyagoo weli sugaya maxkamad, halka dood bulsho oo kulul ay ka dhalatay arrintan.

---

Kiiskii musuqmaasuqa ee gilgilay magaalada Burco toddobaadkii u dambeeyay ayaa galay marxalad cusub oo si dhow isha loogu hayo. Sida aan hore u baahinay, mas’uuliyiin sare oo ka tirsan Dawladda Hoose ee Burco ayaa xafiiska Hantidhawrka Guud ee Qaranka Somaliland xidhay, iyagoo lagu eedeeyay lunsiga iyo ku takrifalka dhul danta guud ah. Kiiskan ayaa si weyn loogu tilmaamay mid ka mid ah tallaabooyinkii ugu miisaanka cuslaa ee la dagaallanka musuqmaasuqa sannadihii u dambeeyay, taas oo dad badan ku abuurtay rajo ku saabsan adkaynta isla xisaabtanka hay’adaha.

Maxkamaddu oo U Jartay 14 Maalmood oo Rummaan ah

Kadib xadhiggii mas’uuliyiinta, Maxkamadda Gobolka Togdheer ayaa go’aamisay in eedeysanayaasha loo jaro 14 maalmood oo rummaan ah, si baadhitaan rasmi ah loogu sameeyo. Mas’uuliyiintan waxaa lagu eedeeyay in ay ku takri faleen hanti qaran, gaar ahaan dhul loo asteeyay dan guud oo ay si khaldan u maareeyeen.

Muddada 14 maalmood ah ayaa loogu talagalay in lagu ururiyo dukumentiyo, lagu baadho diiwaannada dhulka, isla markaana lagu qiimeeyo in ay jirto caddeyn ku filan oo kiiska loo gudbin karo dacwad rasmi ah. Go’aanka rummaanka ayaa muujiyay in maxkamaddu ay u aragtay eedeymaha kuwo culus oo u baahan baadhitaan nidaamsan oo hoos yimaada kormeer sharci.

---

Sii-Dayn Kadib Faragelin Beeleed

Sidii la filayay, kiisku si dhakhso ah ayuu uga gudbay xayndaabka maxkamadda. Odayaal dhaqameed la xidhiidha xoghayaha fulinta ee la eedeeyay ayaa qabtay shir jaraa’id, iyagoo ku dooday in mas’uulkaasi si khaldan loo eedeeyay isla markaana si gaar ah loo bartilmaameedsaday.

Waxay arrintan ku tilmaameen mid ku salaysan siyaasad iyo qabiil, halkii ay ka ahaan lahayd baadhitaan sharci oo caadi ah. Cadaadiskii ka dhashay arrintan ayaa sababay in eedeysanayaasha laga sii daayo xabsiga iyagoo sugaya dacwad, inkastoo baadhitaanku weli socdo.

Sii-dayntani waxay dhalisay su’aalo ku saabsan sida ay hay’adaha la dagaallanka musuqmaasuqa u maareyn karaan kiisaska noocan oo kale ah marka cadaadis beeleed soo farageliyo.

Video Caption:

Odayaasha dhaqanka iyo eheladda eedeysanaha oo shir jaraa’id ku qabtay telefishanka Horn Cable TV, iyagoo si cad u difaacaya daahfurnaanta iyo dembi la’aanta Xoghayaha Fulinta ee Dawladda Hoose Burco, kana soo horjeeda eedeymaha musuqmaasuqa ee loo jeediyay.

---

Dareenka Bulshada: Diidmo Ku Socota Qabiil Ku Difaacidda Musuqmaasuqa

Falcelinta bulshada ayaa noqotay mid degdeg ah oo muuqata, gaar ahaan baraha bulshada. Inta badan dadka ka falceliyay waxay si cad u diideen isku day kasta oo lagu rogi karo kiiska musuqmaasuqa sheeko qabiil.

Qoraallo si weyn loo wadaagay ayaa muujinayay caro iyo niyad jab laga qabo difaaca musuqmaasuqa iyadoo lagu gambanayo qabiil.

“2026 ayaa qof tuug ah oo lacagtii umadda cunay reernimo lagu difaacayaa, dadkani waa dhiman dhiman caadiya.”

“Waxa ina rogaya waa tuug shaadh qabiil lagu difaacayo.”

“Haddii tuugii hantida boobay ay qaar ma xishoodayaal ahi is garab taagaan maxaa la samayn?”

Hadalladan ayaa muujinaya in qayb ballaadhan oo bulshada ka mid ahi ay ka daashay in eedeymaha musuqmaasuqa lagu beddelo dood qabiil, iyagoo ku adkaysanaya in arrintu tahay mid la xiriirta hanti dadweyne oo la lunsaday.

---

Aragtiyo Kale: Eedeyn Ku Saabsan Bartilmaameed Gaar Ah

Dhanka kale, tiro yar oo dad ah ayaa ku celcelinaya aragtida odayaasha dhaqanka, iyagoo ku doodaya in xoghayaha fulinta si gaar ah loo bartilmaameedsaday halka kuwo kale oo la tuhunsan yahay aan wax laga qaban.

Aragtidan waxay isku dayaysaa in kiiska loo sawiro mid ku salaysan qabiil halkii uu ka ahaan lahaa mid sharci.

Si kastaba ha ahaatee, ilaa hadda ma jiro go’aan maxkamadeed oo xaqiijiyay ama beeniyay eedeymaha. Baadhitaanku wuu socdaa, caddeymahana weli si rasmi ah looma soo bandhigin.

---

Kiis Socda oo U Baahan Isha Dadweynaha

Sidii hore loo sheegay, kiiskani weli waa mid socda oo aan gebi ahaanba la soo bandhigin xaqiiqooyinkiisa iyo caddeymahiisa. Eedeysanayaashu waa kuwo la eedeeyay oo la baadhayo, balse aan weli lagu helin dembi maxkamadeed.

Bulshada waxaa lagu dhiirrigelinayaa inay si dhow ula socdaan horumarka kiiskan, iyagoo aan oggolaan in ajandayaal qabiil ama cadaadis bulsho ay leexiyaan geeddi-socodka caddaaladda.

Kiiska musuqmaasuqa Burco wuxuu noqday tijaabo muujinaysa heerka ay Somaliland uga dhab tahay la dagaallanka musuqmaasuqa iyo sida ay hay’adaha sharci u adkeysan karaan marka cadaadis beeleed yimaado.

Waxaan sii wadi doonnaa dabagalka kiiskan, annagoo idinla wadaagi doona wixii xaqiiqooyin cusub ah marka ay soo baxaan.