Go'doominta Khaliijka: Dagaalka Maraykanka Iyo Israa'iil Ee Iiraan Oo Curyaamiyay Duulimaadyadii Caalamka

Shirkadaha diyaaradaha iyo dalxiiska caalamka ayaa la tacaalaya cawaaqibka ba'an ee ka dhashay dagaalka dhanka hawada ah ee sii xoogeysanaya ee u dhexeeya Maraykanka, Israa'iil iyo Iiraan. Xukuumadaha adduunka ayaa ku degdegaya sidii ay dalkooda ugu celin lahaayeen dadka safarka ah ee ku xayiran Bariga Dhexe, kadib markii la baajiyay in ka badan 20,000 oo duulimaad maalmo aad u kooban gudahood.

Xarumaha ugu waaweyn ee duulimaadyada Khaliijka, oo ay ku jirto magaalada Dubai oo leh garoonka ugu mashquulka badan caalamka, ayaa xiran ama si weyn loo xaddiday maalintii afaraad oo xiriir ah, taas oo sababtay in tobannaan kun oo rakaab ah ay go'doon ku noqdaan garoomada. Sida ay xaqiijisay shabakadda la socodka duulimaadyada ee Flightradar24, ilaa 21,300 oo duulimaad ayaa lagu baajiyay todoba garoon diyaaradeed oo waaweyn oo ay ku jiraan Dubai, Doha iyo Abu Dhabi tan iyo markii ay bilaabmeen duqaymaha cirka ah.

Hawadda Barriga Dhexe Dagaalka Horaantiis

Hawadda Barriga Dhexe Inta uu Dagaalku Bilaabmay

Labadan sawir waxay si cad u muujinayaan farqiga weyn ee u dhexeeya isku socodka hawada Bariga Dhexe iyo Khaliijka kahor iyo kadib markii uu xoogeystay dagaalka u dhexeeya Maraykanka, Israa'iil iyo Iiraan.

Waji Cusub Oo Dhaqaale Xumo Ah Iyo Cirkoo Madhan

Weeraradan ayaa gabi ahaanba istaajiyay isu socodka gobolkan oo mudooyinkii dambe isku dayayay in uu dhaqaalihiisa ka leexiyo ku tiirsanaanta shidaalka una weeciyo dhanka ganacsiga casriga ah iyo dalxiiska. Qalalaasahan ayaa sidoo kale soo yareeyay marinkii cidhiidhiga ahaa ee ay isticmaali jireen diyaaradaha ee isku xidha qaaradaha Yurub iyo Aasiya, arrintaas oo xaalad isku dhex yaac ah ku abuurtay dhammaan shirkadaha diyaaradaha ee caalamka.

Rakaabka ku xayiran daafaha Khaliijka ayaa u tartamaya sidii ay u heli lahaayeen kuraas kooban oo loogu talagalay duulimaadyada gurmadka. Tani waxay dhacaysaa xilli dowlado badani ay isku dayayaan in ay muwaadiniintooda dalkooda hooyo ku celiyaan iyada oo isla markaasna ay qaraxyo xooggan ka ruxayaan magaalooyinka Tehraan iyo Beyruut.

Sida ka muuqata khariidadaha shabakadda Flightradar24, hawada dalalka Imaaraadka Carabta, Qadar, Kuweyt, Israa'iil, Baxrayn, Ciraaq iyo Urdun ayaa gabi ahaanba madhan , iyada oo diyaaradaha rayidku ay iska ilaalinayaan in ay dhex maraan aagga dagaalka.

Xaaladda Shirkadaha Waaweyn Ee Bariga Dhexe

Gobolka Bariga Dhexe ayaa hooy u ah qaar ka mid ah shirkadaha diyaaradaha ee ugu waaweyn adduunka, sida Emirates iyo Etihad oo fadhigoodu yahay Imaaraadka, iyo Qatar Airways oo xarunteedu tahay caasimadda Qadar ee Doha. Saamayntu kuma eka oo keliya gobolka Bariga Dhexe, maadaama saddexdan magaalo ay yihiin xarumo isku xira caalamka oo ay sannad kasta sii maraan malaayiin rakaab ah.

Shirkadaha Emirates, flydubai iyo Etihad ayaa billaabay duulimaadyo aad u xaddidan tan iyo maalintii Isniinta, kuwaas oo u badan qorshe lagu daadgureynayo rakaabka go'doonsan. Shirkadda Emirates oo hore u hakisay dhammaan duulimaadyadeeda ayaa Isniintii dib u soo celisay duulimaadyo kooban oo xamuul iyo gurmad ah. Balse, dhammaan duulimaadyadii caadiga ahaa ee shirkadda ee tegi jiray ama ka iman jiray Dubai ayaa ahaan doona kuwo xaniban ugu yaraan ilaa 11:59 habeenimo ee maalinta Arbacada, sida lagu baahiyay bogga rasmiga ah ee shirkadda. Shirkadda Fly Dubai ayaa sidoo kale dib u bilowday duulimaadyo kooban maalintii Isniinta.

Dhanka kale, in kasta oo duulimaadyo rayid oo kooban la qorsheeyay in ay baxaan maalinta Salaasadda, maamulka garoomada Dubai ayaa rakaabka si adag kula taliyay in aysan tegin garoonka ilaa ay si toos ah ula soo xidhiidho shirkadda diyaaradda ee ay raacayaan. Sidoo kale, dhammaan duulimaadyadii ganacsi ee shirkadda Etihad ee ka iman lahaa ama tegi lahaa caasimadda Abu Dhabi ayaa wali ah kuwo gabi ahaanba la joojiyay.