Soo Laabashada Madaxweyne Cirro: Maxaa Ka Dambeeyay Safarkiisii Aamusnaa ee Imaaraadka?
- Hassan Gallaydh
- May 14
- 3 min read
HARGEYSA (May 14, 2026)Ā Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa saaka dib ugu soo laabtay caasimadda dalka ee Hargeysa, ka dib safar muddo ku dhow bil qaatay oo uu ugu maqnaa dalka Isu-tagga Imaaraadka Carabta (UAE). Soo laabashadan ayaa soo afjartay hadal-hayn iyo falanqayn xooggan oo muddooyinkii u dambeeyay ku dhex jirtay bulshada iyo saaxadda siyaasadda Somaliland.
Madaxweyne Cirro oo safarkan keligii ku ahaa, ayaa waxa garoonka diyaaradaha ee Cigaal si diirran ugu soo dhaweeyay masuuliyiin sarsare oo isugu jira xubnaha goleyaasha dowladda iyo saraakiisha laamaha amniga. Soo dhaweynta ka dib, waxa loo galbiyay qasriga madaxtooyada, halkaas oo uu kulan xog-warran ah kula qaatay Madaxweyne Ku-xigeenka iyo xubno ka tirsan golihiisa wasiirrada.
Qoraal kooban oo ka soo baxay Madaxtooyada Somaliland ayaa si cad u sheegay in safarka Madaxweynuhu uu ahaa mid "shakhsi ah," isla markaana uu hadda diyaar u yahay inuu si caadi ah u sii wato hawlihiisa qaranka. Si kastaba ha ahaatee, dabeecadda safarkan oo ahaa mid aad u aamusan, ayaa abuurtay su'aalo iyo xan siyaasadeed oo aan yarayn.
Kala Duwanaanshaha Safarkan iyo Kuwii Hore
Marka la barbardhigo safarradii hore ee Madaxweyne Cirro uu ugu baxay dalalka dibadda, safarkan Imaaraadka waxa uu ahaa mid gebi ahaanba ka duwan. Safarradiisii hore waxa ay u badnaayeen kuwo si weyn loo baahiyo, iyada oo laga arki jiray isagoo ka qayb-gelaya madalo caalami ah, shirar waaweyn, iyo kulamo muhiim ah oo uu la yeelanayo madaxda dalalka shisheeye iyo dublamaasiyiinta caalamiga ah.
Markan, safarku wuxuu ahaa mid si weyn loo qariyay (low-key). Laga soo bilaabo markii uu dalka ka dhoofay 23-kii April, ma jirin wax faahfaahin ah oo laga bixiyay dhaqdhaqaaqiisa, kulamadiisa, iyo ujeeddada dhabta ah ee uu u joogay Imaaraadka. Maqnaanshihiisa dheer iyo macluumaad yaraanta la xidhiidha safarkiisa ayaa keentay in dad badani isweydiiyaan halka uu Madaxweynuhu jaan iyo cirib dhigay.
Hadal Haynta Ictiraafka iyo Abraham Accords: Ma Xaqiiq Baa Mise Waa Dhalanteed?
Xilligan oo dalku isku diyaarinayo xuska maalinta qaranimada ee 18-ka May, maqnaanshaha Madaxweynaha ayaa dhaliyay xan siyaasadeed oo aad u xooggan. Suuqa siyaasadda Somaliland waxa si weyn u dhex mushaaxaysay in safarkani uu daarnaa olole culus oo lagu raadinayo aqoonsi diblomaasiyadeed ka hor maalinta weyn ee 18-ka May.
Xanahan ayaa dhex muquunayay sheegashooyin ah in dalal dhawr ah oo ay ka mid yihiin Giriigga (Greece), Imaaraadka Carabta (UAE), Arjantiin (Argentina), Iswatini (Eswatini), iyo dalal kale ay qorshaynayaan inay dhawaan aqoonsadaan madax-bannaanida Somaliland. Sidoo kale, waxa jiray warar la isla dhexmarayay oo xusaya suurtagalnimada in Somaliland ay ku biirto heshiiska loo yaqaan 'Abraham Accords' ee dalalka Carabtu ay xidhiidhka kula yeelanayaan Israa'iil, iyadoo taas beddelkeeda la filayo aqoonsi caalami ah.
Si kastaba ha ahaatee, xogta ilaa hadda rasmiga ah ee ka soo baxday Madaxtooyada ayaa gabi ahaanba meesha ka saaraysa in safarkani ahaa mid shaqo qaran, iyagoo ku adkaystay inuu ahaa mid shakhsi ah. Inkasta oo laamaha dawladdu ay isku dayeen inay damiyaan xantaas, haddana falanqeeyayaasha siyaasadda ayaa aaminsan in toddobaadka soo socda, gaar ahaan marka la dhaafo munaasabadda 18-ka May, ay caddaan doonto in wararkaasi ahaayeen uun xan suuqa lagu abuuray iyo in ay jireen dhaqdhaqaaqyo diblomaasiyadeed oo qarsoodi ahaa.
Gunaanad
Soo laabashada Madaxweyne Cirro ayaa ku soo beegmaysa xilli Somaliland ay ku jirto diyaargarowga weyn ee xuska 18-ka May. In kasta oo xafiiska Madaxweynuhu caddeeyay in safarku ahaa mid nasasho iyo arrimo shakhsi ah, aamusnaanta safarkan ku gedaaman ayaa shacabka ku reebtay dareen tabasho iyo xiiso ay ku sugayaan waxa ka soo kordha siyaasadda arrimaha dibadda ee dalka maalmaha soo socda. Haddii ay jirto guul diblomaasiyadeed oo hoosta laga soo dhisayay iyo haddii uu ahaa uun safar caadi ahba, xaqiiqadu waxay soo shaac bixi doontaa marka la galo xudunta munaasabadaha qaran ee bishan.
