Madaxweynaha Somaliland Oo La Filayo In Uu Socdaalkiisii Ugu Horreeyay Ee Rasmi Ah Ku Tago Dalka Israel
- Gallaydh News Desk
- Feb 25
- 2 min read
Sida uu baahiyay wargeyska Jerusalem Post, Madaxweynaha Jamhuuriyadda Somaliland, Cabdiraxmaan Maxamed Cabdullaahi (Cirro), ayaa la filayaa in uu booqashadiisii ugu horraysay ee rasmi ah ku tago dalka Israel dhammaadka bisha Maarso ee sannadkan. Safarkan ayaa noqonaya mid taariikhi ah oo sii xoojinaya xidhiidhka diblomaasiyadeed ee dhowaan curtay ee u dhexeeya labada dhinac.
In kasta oo kani yahay safarkiisii rasmiga ahaa ee ugu horreeyay ee uu dalkaas ku tago, haddana ma aha markii ugu horraysay ee Madaxweyne Cirro uu cago dhigo Israel. Sida ay xaqiijiyeen ilo xog ogaal ah, madaxweynaha ayaa horay safar qarsoodi ah ugu tagay Israel intii ay socdeen wada-hadalladii diblomaasiyadeed ee horseeday in xukuumadda Tel Aviv ay si rasmi ah u aqoonsato qaranimada Somaliland bishii Diseembar ee sannadkii 2025. Wada-xaajoodyadaas aamusan ayaa udub dhexaad u ahaa is-fahamka is-beddelka weyn keenay ee hadda ka dhex jira Hargeysa iyo Jerusalem.
Iyada oo laga duulayo horumaradaas, Somaliland oo ilaa hadda ay aqoonsi buuxa siisay oo keliya Israel ayaa doonaysa in ay xidhiidhkeeda gaadhsiiso heerar ka baxsan arrimaha diblomaasiyadda. Xukuumadda Somaliland ayaa xiisaynaysa in ay ballaariso iskaashiga ay la leedahay Israel, gaar ahaan dhinacyada tignoolajiyadda, horumarinta beeraha iyo hal-abuurka ganacsiga, iyada oo la og yahay in Israel ay hormuud ka tahay qeybahaas heer caalami.
Maxaa Laga Filan Karaa Ajendaha Safarkan?
Saxiixida Heshiisyo Laba Geesood Ah: In la gaadho heshiisyo rasmi ah oo la xidhiidha maalgashiga tooska ah iyo is-dhaafsiga ganacsiga ee labada waddan.
Iskaashiga Dhanka Beeraha: In laga faa'iidaysto khibradda qotada dheer ee Israel ay u leedahay nidaamyada waraabka casriga ah iyo kobcinta wax-soo-saarka beeraha Somaliland si looga hortago abaaraha soo noqnoqda.
Horumarinta Tignoolajiyadda iyo Hal-abuurka: In la abuuro xidhiidh wada-shaqayneed oo kor loogu qaadayo xirfadaha tignoolajiyada ee dhalinyarada iyo casriyeynta nidaamyada hay'adaha dowladda.
Amniga Iyo Difaaca Marinka Badda Cas: In kasta oo aan si rasmi ah loo shaacin, haddana waxaa suurtagal ah in dhinacyadu ay isdhaafsadaan xog iyo iskaashi ku aadan sugida amniga marinka istiraatiijiga ah ee Badda Cas iyo Gacanka Cadan.
