Hoggaamiyaha Cusub Ee Iiraan Oo Soo Saaray Hanjabaado Culus
- Hassan Gallaydh
- 4 days ago
- 3 min read
Tehraan, Iiraan Hoggaamiyaha cusub ee ruuxiga ah ee dalka Iiraan, Mojtaba Khamenei, ayaa markii ugu horraysay soo saaray bayaan rasmi ah tan iyo markii uu xilka kala wareegay aabbihii oo la khaarajiyay. Bayaankan oo la baahiyay Khamtiistii ayaa xambaarsan farriimo adag oo muujinaya in xukuumadda Tehraan ay sii wadi doonto dagaalka, iyada oo wacad ku martay in ay sii xidhi doonto Marinka Hormuz, isla markaana ay si toos ah u beegsan doonto saldhigyada Maraykanka ee Bariga Dhexe.
Qoraalkan oo laga sii daayay warbaahinta dowladda ayaa noqonaya hadalkii ugu horreeyay ee uu jeediyo 56 jirkan tan iyo markii xilka ugu sarreeya dalka loo doortay 9-kii bishan March, kadib markii aabbihii, Ayatollah Ali Khamenei, lagu dilay duqaymo cirka ah oo ay fuliyeen Maraykanka iyo Israa'iil dhammaadkii bishii labaad.
Hubka Dhaqaalaha Iyo Khatarta Marinka Hormuz
Bayaankan oo ay faafisay wakaaladda wararka ee Tasnim oo ay maamulaan Ciidamada Ilaalada Kacaanka Islaamiga ah (IRGC), ayaa Khamenei waxa uu ku sheegay in xidhnaanshaha Marinka Hormuz uu yahay tabcad muhiim ah. Marinkan oo ah waddo badeed xasaasi ah oo ay marto shan meelood meel shidaalka adduunku, ayuu hoggaamiyuhu xusay in xidhnaanshihiisu uu sii socon doono si loogu adeegsado "hub lagu cadaadiyo cadowga".
Tallaabadan ayaa ah isku day cad oo ay Iiraan ku doonayso in ay dhaqaalaha caalamka curyaamiso, si ay culeys weyn u saarto isbahaysiga reer Galbeedka. Sidoo kale, wuxuu dalbaday in dhammaan saldhigyada milatari ee Maraykanku uu ku leeyahay gobolka si degdeg ah loo xidho, isaga oo wacad ku maray in haddii kale "saldhigyadaas la weerari doono." In kasta oo uu jeediyay hanjabaadahan culus, bayaanku wuxuu dhanka kale xaqiijiyay in Iiraan ay sii wadayso xidhiidhka saaxiibtinimo iyo deris wanaagga ee ay la leedahay waddamada gobolka.
Aargudashada Shuhadada Iyo Iskuul Gabdhaha Ee Minab
Isaga oo dhiirrigelinaya shacabkiisa xilli uu dagaalku galay maalintiisii 13-aad, bayaanka Khamenei ayaa si kulul loogu xusay in Iiraan aanay marnaba ka waaban doonin in ay u aarguddo dhiigga shuhadadeeda. Wuxuu si gaar ah farta ugu fiiqay dhibanayaashii ku dhintay weerarkii waxashnimada ahaa ee 1-dii March lala beegsaday iskuul gabdhuhu wax ku bartaan oo ku yaalla magaalada Minab. Mas'uuliyiinta Iiraan ayaa xaqiijiyay in duqayntaasi ay galaafatay nolosha ugu yaraan 165 qof oo u badnaa carruur dugsi.
Isaga oo tixraacaya isbahaysiga Maraykanka iyo Israa'iil, wuxuu Israa'iil ku tilmaamay "sharka dunida," wuxuuna caddeeyay in ay fashilmeen dhammaan dedaalladii iyo shirqooladii la doonayay in lagu kala qaybiyo shacabka Iiraan. Wuxuu ummadda Iiraan ugu baaqay midnimo iyo isku duubni xooggan si looga gudbo xaaladdan adag.
Shaki Ku Gedaaman Caafimaadka Hoggaamiyaha
In kasta oo bayaankan loo bandhigay in uu yahay kii hoggaamiyaha cusub, haddana waxaa jirta hubanti la'aan ku aaddan in Mojtaba Khamenei uu isagu shakhsiyan soo saaray ama ku dhawaaqay. Bayaanka ayaan ahayn muuqaal toos ah, balse waxaa telefishinka qaranka ka akhriyay weriye dowladda u shaqeeya, halka shaashaddana la soo dhigay sawirka Khamenei oo keliya, arrintaas oo dunida u baahday.
Habkan ayaa sii kordhiyay shakiga iyo hadal haynta ku aaddan xaaladdiisa caafimaad iyo goobta uu dhab ahaan ku sugan yahay. Sida ay sheegtay idaacadda NPR ee dalka Maraykanka, sarkaal Israa'iili ah oo diiday in magaciisa la shaaciyo ayaa xaqiijiyay in Mojtaba Khamenei uu dhaawac fududi ka soo gaadhay weerarkii dhacay dhammaadkii bishii Febraayo, kaas oo lagu burburiyay xaruntii aabbihii, isla markaana ay ku dhinteen Ayatollah Ali Khamenei iyo xubno kale oo qoyskiisa ah.
Khubarada falanqeeya arrimaha Bariga Dhexe ayaa aaminsan in 56 jirkan oo lagu tilmaamo shakhsi ka mayal adag, kana muxaafid san aabbihii, uu doonayo in uu tuso dunida in nidaamka Iiraan aanu daciifin. Hadalladiisa ugu horreeya ee ku aaddan in uu Marinka Hormuz u isticmaalo hub dhaqaale, iyo hanjabaadda tooska ah ee ka dhanka ah Maraykanka, waxay xaqiijinayaan in gacan-ku-haynta awoodda dalku ay si buuxda ugu wareegtay garabka milatariga, waxana muuqata in gobolku uu wajahayo dagaal xaalufin ah oo aan lahayn rajo dhaw oo lagu xallin karo.
