Maayar Ciddin oo Xilka Ka Degay Kadib 14 Sano iyo Xaqiiqada Mooshinka Berbera
BERBERA (July 25, 2026)Ā Magaalada dekedda ah ee Berbera ayaa maanta martigelisay dhacdo siyaasadeed oo soo afjartay xilli taariikhi ah oo salka ku hayay maamul soo taxnaa in ka badan toban sano. Maayarkii magaalada Berbera, Mudane Cabdishakuur Maxamuud Xasan (Ciddin), ayaa si rasmi ah isaga casilay xilkii duqa magaalada kadib 14 sano oo uu hoggaanka hayay. Go'aankan ayaa yimid kadib culays siyaasadeed oo xooggan oo kaga yimid garab aqlabiyad ah oo ka tirsan Golaha Deegaanka Berbera iyo xukuumadda dhexe oo aakhirkii u fasaxday inay kalfadhi qabsadaan.
Sidoo kale, waxaa isna xilka iska casilay Maayar Ku xigeenkii magaalada, Nuur Cabdi Jaamac (Nuur Cadde), taas oo waddada u xaaraysa in isbeddel guud lagu sameeyo hoggaanka dawladda hoose ee degmada ugu dhaqaalaha badan Jamhuuriyadda Somaliland. Waxaana xilka maayar ku xigeenka dambe si weyn loogu saadaalinayaa in uu u tartamo xildhibaan Yacquub.
Culayska Siyaasadeed
Iscasilaadda Maayar Ciddin ma ahayn mid lama filaan ah, balse waxay ahayd gunaanadka loollan adag oo muddooyinkii u dambeeyay ka dhex aloosnaa golaha deegaanka. Xildhibaanno gaadhaya siddeed xubnood oo ah aqlabiyadda golaha ayaa dhawaanahan olole culus oo xil ka qaadis ah (Mooshin) ka waday gudaha magaalada Hargeysa. Xubnahan ayaa isku urursaday guri ku yaalla caasimadda, iyaga oo go'aan ku gaadhay in ay ridaan Cabdishakuur Ciddin, beddelkiisana ay duqa magaalada u doortaan Xildhibaan Maxamed Ibraahim Dable oo ah ganacsade caan ah, muddo dheerna damac kaga jiray hoggaanka Berbera.
Dadaalladii ugu dambeeyay ee uu Maayar Ciddin ku doonayay in uu kaga badbaado mowjaddan siyaasadeed ayaa fashilmay kadib markii xukuumaddu ay u muuqatay in ay garab siinayso xildhibaannada mooshinka wada, isla markaana ay meesha ka saartay difaacii ay markii hore u fidinaysay maayarka.
Difaaca Dhaxalka iyo Diidmada Musuqmaasuqa
Isaga oo warbaahinta kula hadlayay munaasabaddii is casilaadda ee gudaha magaalada Berbera maanta, Cabdishakuur Ciddin ayaa si deggan u sharraxay sababaha ku kallifay in uu baneeyo kursiga. Waxa uu sheegay in go'aankiisu uu salka ku hayo tanaasul iyo ilaalinta danta guud ee shacabka.
"Waxaanu go'aansannay inaanu is casilno oo kursigaa Berbera dhib ku keenin," ayuu yidhi duqii hore ee magaaladu
Isaga oo muujinaya in aanu doonayn in loollanka siyaasadeed uu khalkhal geliyo nabadgelyada iyo horumarka magaalada.
Intii lagu jiray shirkiisa jaraa'id, Ciddin waxa uu si adag u beeniyay, gabi ahaanna meesha uga saaray eedeymo la xidhiidha musuqmaasuq iyo hanti qaran oo la lunsaday. Waxa uu si kalsooni leh u caddeeyay in ilaalinta iyo dabagalka hantida qaranku ay tahay shaqada Hantidhowrka Guud ee Qaranka, ilaa haddana aanay jirin wax eedeymo rasmi ah ama gal dacwadeed oo ay hay'adaha sharcigu ku soo oogeen maamulkiisa. Waxa uu ku nuuxnuuxsaday in maamulkiisu uu si buuxda ula shaqaynayay, isla markaana uu u hoggaansamay dhammaan shuruucda iyo baadhitaanada Hantidhowrka.
Sooyaalka Ciddin iyo Xaalka Berbera
Cabdishakuur Ciddin waxa uu xilka duqa magaalada Berbera si rasmi ah ula wareegay 20 kii December 2012. Markii ugu horraysay waxa uu golaha deegaanka kasoo galay tigidhka xisbiga mucaaridka ah ee UCID, balse markii dambe waxa uu ku biiray xisbiga talada haya ee KULMIYE oo uu ilaa hadda ka tirsan yahay. Muddo 14 sano ah oo isku bixisa ayuu maamulayay Berbera, taas oo ka dhigaysa maayarkii labaad ee ugu muddada dheeraa ee soo mara taariikhda dawladaha hoose ee Somaliland.
Muddadii uu xilka hayay, magaalada Berbera waxay samaysay horumar la taaban karo oo dhinaca dhismaha waddooyinka, bilicda, iyo ballaadhinta adeegyada aasaasiga ah ah. Hase yeeshee, sannadihii ugu dambeeyay, maamulkiisu waxa uu wejahay dhaleecayn xooggan oo kaga imanaysay shacabka, taas oo inta badan la xidhiidhay maareynta dhibaatooyinka korontada iyo biyo la'aanta baahsan ee xilliyada xagaaga ragaadisa nolosha bulshada.
Fasaxa Xukuumadda iyo Kalfadhiga Degdegga ah
Xukuumadda Dhexe, oo hore u hantay shaqadii golaha iyada oo si cad u diiddanayd in kalfadhi aan caadi ahayn la qabto intii uu Maayar Ciddin xilka fadhiyay, ayaa caddaysay mowqifkeeda cusub isla markii uu dhacay go'aanka is-casilaadda. Halka ay Wasaaradda Dawladaha Hoose hore u diiddanayd in ay fasaxdo mooshinka xildhibaannada is-beddel doonka ah, iyada oo ku doodayay in aanay ku qancin eedaha loo soo jeediyay maayarka, ayaa isla markii uu Cabdishakuur Ciddin ku dhawaaqay in uu xilka ka degay si adag oo degdeg ah uga bixisay fasax rasmi ah oo Golaha Deegaanka Berbera u oggolaanaya in ay fadhigaas yeeshaan.
Warqad rasmi ah oo uu saxeexay Wasiirka Wasaaradda Dawladaha Hoose iyo Horumarinta Magaalooyinka, Xasan Axmed Ducaale (Macallin), oo la soo saaray kadib markii ay shaac-baxday is-casilaadda maayarka, ayaa lagu muujiyay in siddeedda xildhibaan ay codsigooda qabashada kalfadhiga soo gudbiyeen wax intaas ka horraysay oo ahayd July 13, 2026. Wasaaradda oo markii hore kor u haysay xayiraadda kalfadhiga ayaa hadda si buuxda u fasaxday, iyada oo oggolaatay in kalfadhiga lagu dooranayo Maayarka iyo Maayar Ku-xigeenka cusub uu qabsoomo maalinta Axadda ee July 26, 2026, saacadda 7:00 subaxnimo, iyada oo Guddoomiyaha Gobolka Saaxilna lagu faray in uu shir-guddoomiyo fadhigaas.
Gunaanad
Is casilaadda Cabdishakuur Ciddin waxay soo xidhaysaa cutub dheer oo ka mid ah taariikhda Berbera, waxayna magaalada gelinaysaa xilli cusub oo rajo iyo tijaabooyin wata. Indhaha bulshada reer Saaxil iyo guud ahaan Somaliland waxay haatan eegayaan kalfadhiga berrito ee July 26, 2026, kaas oo la filayo in Xildhibaan Maxamed Ibraahim Dable uu si rasmi ah ugula wareego hoggaanka magaalada. Masuuliyadda hortaalla maamulka cusub ayaa ah mid aad u culus, iyada oo laga sugayo xal degdeg ah oo laga gaadho caqabadaha taagan, gaar ahaan hagaajinta adeegga korontada oo ah baahida ugu weyn ee ay tabayaan shacabka ku dhaqan halbowlaha dhaqaalaha dalka.
