Golaha Nabadda ee Trump oo Shirkiisii Ugu Horreeyay Qabtay

Gallaydh News Desk
Feb 20
3 min read

Washington ayaa martigelisay kulankii ugu horreeyay ee Golaha Nabadda ee uu aasaasay Madaxweyne Donald Trump, iyadoo diiradda la saaray wejiga labaad ee xabbad-joojinta Qasa, dib u dhiska iyo hub ka dhigista Xamaas. Inkastoo $7 bilyan la ballanqaaday, su’aalaha ku saabsan sharciyadda, hirgelinta iyo doorka Qaramada Midoobay ayaa weli taagan.

Washington ayaa Khamiistii martigelisay kulankii ugu horreeyay ee Golaha Nabadda ee uu ku dhawaaqay Madaxweynaha Maraykanka Donald Trump, kulan uu ku tilmaamay “mid ka mid ah maalmaha ugu muhiimsan inta aan ku jirnay siyaasadda.” Shirkan oo ay ka soo qeybgaleen wakiillo ka socda in ka badan 40 dal, oo ay ku jiraan madax sare iyo wasiirro, ayaa si gaar ah diiradda u saaray wejiga labaad ee xabbad-joojinta jilicsan ee Qasa iyo qorshaha dib u dhiska.

Trump ayaa ku dhawaaqay in dalalka xubnaha ka ah ay ballanqaadeen in ka badan $7 bilyan oo loogu talagalay “xidhmo gargaar iyo dib u dhis” oo Qasa ah, halka Maraykanku ku daray $10 bilyan oo uu ugu talagalay hindisaha Golaha Nabadda, taas oo uu ku sheegay “maalgashi yar marka loo eego kharashka dagaalka.” Qaramada Midoobay ayaa la filayaa inay ku darsato $2 bilyan oo gargaar bani’aadannimo, halka hay’adda kubadda cagta FIFA ay ballanqaadday $75 milyan oo mashaariic horumarineed.

Qasa: Dib u Dhis ka Hor Hub Ka Dhigis?

Wejiga labaad ee qorshaha Maraykanku dhexdhexaadiyay waxaa ku jira hub ka dhigista Xamaas iyo dib u dhiska Qasa. Ra’iisul Wasaaraha Israel Benjamin Netanyahu ayaa caddeeyay in “aan wax dib u dhis ah dhici doonin ka hor inta aan hubka laga uruurin Qasa.”

Trump ayaa sheegay in ay “u muuqato” in Xamaas ay hubka dhigeyso, balse ilaa hadda ma jiraan caddeymo muujinaya in kooxda Falastiiniyiinta ahi oggolaatay hub ka dhigis shuruud la’aan ah. Xamaas waxay hore u muujisay in hub ka dhigidu ku xidhnaan doonto ka bixitaanka Israel ee Qasa.

Dhaqaalaha Qasa ayaa burburay, iyadoo Qaramada Midoobay ku qiyaastay khasaaraha ku dhacay kaabayaasha iyo dhismayaasha $70 bilyan. Haddaba, su’aashu waxay tahay: yaa maamuli doona Qasa marka dagaalku istaago?

Ciidamo Cusub iyo Booliis Kala-soocan

Nickolay Mladenov, oo loo magacaabay Wakiilka Sare ee Qasa ee Golaha, ayaa sheegay in la bilaabay qorista ciidan booliis Falastiini ah oo ku-meel-gaar ah, iyadoo saacado gudahood ay isdiiwaangeliyeen 2,000 qof. Si kastaba, Maraykanka iyo Israel ayaa ku adkaysanaya in ciidankan aan laga soo xulan karin booliiska ay Xamaas maamusho, isla markaana aan si toos ah looga dhigi karin ciidammada Maamulka Falastiin ee Daanta Galbeed. Taasi waxay ka dhigan tahay in qaab amni oo cusub laga dhisayo eber.

Qorshuhu wuxuu dhigayaa in Booliiska Falastiiniyiinta ay noqdaan hay’adda amni ee koowaad, iyadoo ay taageerayaan Ciidamo Caalami ah oo Xasilin oo la shaqeyn doona Israel iyo Masar si loo sugo xuduudaha loona hubiyo hub ka dhigis joogto ah oo ka dhan ah kooxaha aan dowliga ahayn.

Hase yeeshee, khubaro badan ayaa su’aal ka keenaya in ciidamo cusub ay si dhab ah u maareyn karaan hub ka dhigista Xamaas, iyadoo aan la helin heshiis siyaasadeed oo qoto dheer.

Yaa Taageeray, Yaa Ka Gaabsaday?

Dalal ay ka mid yihiin Kazakhstan, Azerbaijan, Imaaraadka, Morocco, Baxreyn, Qatar, Sucuudiga, Uzbekistan iyo Kuwait ayaa lagu sheegay inay si wadajir ah u ballanqaadeen in ka badan $7 bilyan. Dhinaca kale, quwadaha reer galbeedka sida UK, Canada, France iyo Germany ayaa diiday ku biirista Golaha, iyagoo ka cabsi qaba in hay’addan cusub ay la tartanto Qaramada Midoobay.

Trump ayaa isku dayay inuu dejiyo walaacaas, isaga oo sheegay in Golaha Nabadda “si dhow ula shaqeyn doono Qaramada Midoobay” isla markaana “dib loo soo celin doono” doorka UN-ka.

Trump ayaa ku adkeystay in Golaha Nabadda uusan ku ekaan doonin Qasa oo keliya, balse uu faragelin doono “goobaha kulul” ee caalamka. Wuxuu ku tilmaamay hindisahan mid awood u siinaya xubnaha inay “sameeyaan waxyaabo ay dad kale xitaa qiyaasi waayeen.”

Si kastaba, su’aalaha ugu waaweyn ayaa weli taagan:Ma noqon doonaa Golaha Nabadda madal wax ku ool ah oo xasilin iyo dib u dhis horseedda? Mise wuxuu sii kordhin doonaa kala qaybsanaanta nidaamka caalamiga ah?Ma suurtagalbaa hub ka dhigista Xamaas iyadoo aan la gaarin heshiis siyaasadeed oo dhameystiran?

Inta ay xabbad-joojintu jilicsan tahay, jawaabaha su’aalahan ayaa go’aamin doona mustaqbalka Qasa iyo doorka Golaha Nabadda ee Trump ee siyaasadda caalamiga ah.