Canada & China: Heshiis Cusub iyo Xidhiidh Diblomaasiyadeed

Canada ayaa heshiis istiraatiiji ah la gaadhay China, taas oo ka turjumaysa dib u dejin xidhiidhka ka dhaxeeya labada dal iyadoo la dhimayo cashuuro, lana ballaadhinayo iskaashiga ganacsi iyo maalgashi.

---

Madaxweynaha Canada Mark Carney ayaa sharraxay heshiis cusub oo istiraatiiji ah oo uu la galay Shiinaha intii uu booqasho ku joogay caasimadda Beijing, taas oo calaamad u ah dib u dejinta xiriirka labada dal kadib sannado ay ka jirtay xiisad ganacsi iyo diblomaasiyadeed. Heshiiskan ayaa imaanaya iyadoo Canada ay isku dayayso inay kala duwanaato istaraatiijiyadda ganacsi ee ay ku tiirsanayd Mareykanka maadaama uu xidhiidhka Washington iyo Ottawa uu ahaa mid kacsan sannadihii ugu dambeeyey.

Labada dal ayaa ku heshiiay in la yareeyo cashuuraha laga qaado badeecooyin muhiim ah oo ka kala imaanaya midba midka kale si ganacsiga u kobco. Canada waxay ogolaatay in ilaa 49,000 baabuur koronto ah oo Shiinaha laga keeno suuqeeda sanadkiiba iyada oo lagu dalacayo cashuur dhan 6.1%, taas oo hoos loo dhigay cashuurtii hore ee ahayd 100% taas oo lagu soo rogay ilaa 2024. Dhanka kale, Shiinaha ayaa ballan qaaday in uu si weyn u dhimi doono cashuuraha laga qaado saliida cuntadda ee canola oo ah badeeco muhiim u ah dhaqaalaha Canada, taas oo laga filayo in uu ku dhaco heer qiyaastii 15% marka la gaadho bisha March ee sannadkan, hoosna uga dhiganta heerka ahaa 84% ee horay loo soo rogay.

Heshiiskan ayaa soo afjaraya xiisado ganacsi oo labada dhinac soo wada mareen, kuwaas oo salka ku hayay cashuuraha iyo xayiraadaha badeecooyinka. Shiinaha ayaa hore u soo rogay cashuuro aad u sareeya badeecooyin ka yimaada Canada, sida canola (saliida cuntada), dabadeed Canada ayaa ka jawaabtay iyadoo cashuuro adag saartay baabuurta elegtirikga ah ee Shiinaha laga keeno. Heshiiskan cusub waxa uu ballan qaadayaa in cashuuraha noocaas ah la dhimo, taas oo fursad u siinaysa labada dhinac in ay dib u helaan suuqyo muhiim ah.

Madaxweynaha Carney ayaa booskiisa ka sheegay in xiriirka cusub uu yahay “iskaashi istiraatiiji ah” oo loo sameeyey in lagu wajaho xaaladda cusub ee siyaasadda iyo dhaqaalaha adduunka, isaga oo tilmaamay in labada dal ay ka shaqayn doonaan meelo ay ku jiraan beeraha, tamarta nadiifta ah, iyo tiknoolajiyadda si loo abuuro faa’iidooyin waaweyn oo labada dhinacba ka dhasha.

Canadian Council of Canada iyo ururrada beeraha ayaa soo dhaweeyey qorshahan, iyaga oo ku tilmaamay tallaabo muhiim ah oo dib u soo celinaysa helitaanka suuqa weyn ee Shiinaha kaas oo qiimihiisu lagu qiyaasay $4 bilyan ee abuurka saliida canola sannadkii hore. Waxay rajeynayaan in dhimista cashuuraha ay siin doonto kalsooni dheeraad ah beeraleyda iyo soosaarayaasha si ay u suuq geeyaan badeecooyinkooda.

Si kastaba ha ahaatee, waxaa jira dhaliilo gudaha Canada ka soo baxay, iyadoo qaar ka mid ah siyaasiyiinta gobollada, gaar ahaan kuwa taageera warshadaha baabuurta gudaha, ay ka digayaan in heshiiskan uu caqabad ku noqdo shaqooyinka gudaha iyo tartanka suuqyada. Sidaas oo ay tahay, heshiiskan ayaa astaan u ah sida ay dowladdu ugu baahan tahay in ay balaadhiso xidhiidhkeeda ganacsi si ay uga madax-bannaanato kaliya hal suuq ama hal xisbi siyaasadeed.

Dib u dejintan istiraatiijiga ah ee xidhiidhka Canada–China waxay muujinaysaa isbeddel ku wajahan siyaasadda ganacsi ee caalamka, iyadoo dalalka waaweyn ay raadinayaan fursado cusub oo koboc dhaqaale iyo iskaashi istiraatiiji ah xilli xiriirrada caalamku ay marayaan isbedello degdeg ah.